من هي نانسي؟

الاسم : نانسي موسى
التخصص الدراسي : إدارة اعمال


1.منذ متى تستخدم الفيس بوك وما هي أهم أنشطتك عليه ؟
 بديت استخدم الفيس بوك سنة 2008 تحديدا آخر شهر 3... اكتر انشطتي عليه تواصلي مع اصدقائي الي بعتبرهم جزء كتير مهم في حياتي وطبعا مشاركتهم معظم نواحي حياتهم ,, وحاليا نشاطي ازداد بعد ما صرت مشرفة بصفحة المطبخ.


2.كيف تعرفت على صفحة المطبخ النابلسي ؟
 تعرفت على المطبخ النابلسي من خلال صديق صار مشرف معنا حاليا بالمطبخ وهو عمرو جاموس وعملت لايك للصفحة وبلشت اتابعها.


3. ما هو انطباعك عن الصفحة عندما رأيتها؟
 اول ما تابعت الصفحة لفت انتباهي الأكلات والحلويات الي كانت تتقدم خاصة إنها بتكون مرفقة بطريقة العمل , فقلت ان شاء الله بستفيد منها في المستقبل القريب "يعني الشغلة كانت مصلحة مش اكتر" مع اني بعرف اطبخ الحمد لله بس قلت بصير محترفة مستقبلا .


4. هل تجيد الطهي وكيف تعلمته وأتقنته؟
 الحمد لله بنسبة 75% وبعمل حلويات  الفضل الأول والأخير في تعليمي الطبخ للوالدة الله لا يحرمني منها وطبخها لا يُعلى عليه.  ما كانت الاكلات تزبط معي من المرة الأولى ، اول مرة عملت فيها مقلوبة طلعت مخبصة نصها مي ، شوي شوي صار الوضع احسن واحسن ، في مرة حاولت أبدع وأعمل كوسا محشي حطيت عليه سكر " طبعا لا تسألوا عن الطعم لإنه كان بجنن "


5.ما علاقة الطبخ بالثقافة والهوية الفلسطينية؟
 في علاقة قوية بين الطبخ والهوية الفلسطينية ... مثال بسيط اول ما ينذكر المسخن بنقول اكل فلسطيني .


6كيف تنظر للمطبخ الفلسطيني مقارنةً بالمطابخ العربية والعالمية؟
. المطبخ الفلسطيني مطبخ متنوع وغني جدا ، وبلاقي انه في تشابه بين المطبخ السوري واللبناني كمان والي بعتبرهم من أشهى المطابخ سواء على الصعيد العربي أو العالمي.


7. كيف تقيم تجربتك في الاشراف على المطبخ النابلسي؟
 انا مشرفة جديدة متل ما بتعرفوا وبحاول أقدم كل شي بخص مجتمعنا العربي والاسلامي بشكل خاص أي شي بشوفه مناسب وبهم الأعضاء وبرتقي بالمطبخ للأفضل . قدمت جهد بسيط جداً مقارنة بزميلاتي وزملائي بالمطبخ وطبعا بخصوص التقييم هالشي انا ما بقدر اقيم نفسي بعمل الي بقدر عليه والتقييم متروك للإدارة والأعضاء بطريقة تفاعلهم مع الشغلات الي بشارك فيها.


8. ما هي ردة فعل الأهل والأقارب عندما يشاهدوك تصور كل وصفة وأكلة ؟ أذكر لنا بعض تعليقاتهم وهل حدثت أي مواقف طريفة وهل أصبحنا نصور كل شيء يختص بالطعام؟؟
 بنسبة لتصوير الطبخات ، الصورة الأولى كانت طبخة أوزي انا عملتها كنت لسى واحدة من الأعضاء وطبعا بعتها على ايميل المطبخ وجننتهم كل يوم ابعت ايميل حتى ينزلوها ^_^ وتاني مرة لما صرت مشرفة وكانت لصورة فطاير بزعتر.
 بعد ما صرت مشرفة البديهي اني اصور اكلات اكتر "بتعرفوا من منطلق الاحساس بالمسؤولية" وللأسف ما تزبط معي دائما ، في مرة كنا معزومين في بيت اصدقاء للعيلة على منسف "مين ما بحب المنسف" فقاعدين على طاولة الاكل والست بتحضر وانا بساعدها واول ما لفت وراحت على المطبخ مسكت الجوال حتى اصور الطاولة لإنه كان المنظر مشهي فانتبه بابا بقولي "شو بتساوي فضحتينا حد بصور الأكل" طبعا الصورة ما طلعت واضحة وراحت عليكم .


9. كيف توفق بين المطبخ النابلسي والاشراف عليه وباقي مشاغل الحياة؟
الصراحة عادة بكون في اوقات الصبح عندي ضغط شغل فما بقدر اتابع او اشارك كتير بالمطبخ ، يعني بحاول على قد ما بقدر لما يخف الشغل اشوف شو بقدر اقدمه ، وبطبيعة الحال بس اوصل البيت بصير عندي الوقت المناسب لإني اشارك الاعضاء الكرام ، وفي حال انشغلت طبعا الزميلات والزملاء اكيد بقوموا بالواجب .


10. اذكر لنا موقفاً طريفاً حدث لك ؟
 مش موقف عدة مواقف، بس خليني اذكر موقف بسيط ,, طبيعة شغلي مكتبي ,, يعني كمبيوتر وتلفونات كتير ورا بعض ودائما برفع السماعة (الو) كل شوي (الو)
ففي مراجع بيوم بدخل على المكتب بقولي السلام عليكم قلتله (الو)


11.ما هي أمنيتك في هذه الحياة
 امنية حياتي : تحرير فلسطين وعلى الصعيد الشخصي رضى ربي وتكوين اسرة مثالية


12ماذا تقول للمطبخ النابلسي وأعضائه في هذا اليوم ؟.
اول شي حابة اهني جميع الزميلات والزملاء على هالصفحة المتميزة وبقولهم يعطيكم الف عافية على الجهد الي بتعملوه وتاني شي بهني اسماء  وبقولها شكرا لثقتك بشخصي واختياري كمشرفة وبتمنى للصفحة وكل القائمين عليها كل تقدم وخير يا رب,, وللأعضاء الكرام بتمنى انكم تستفيدوا وتستمتنعوا بمحتوى المطبخ وان شاء الله بكون عند حسن ظن الجميع